Friday, 12 April 2019

ਪੰਜਾਬ ਦੀ ਸਰਜ਼ਮੀਨ ਦੀ ਫ਼ਰਿਆਦ

ਕਿਉਂ ਨਹੀਂ ਸੁਣਦਾ ਪਿਆ ਤੱਤੜੀ ਦੀ ਚੀਕ ਕੋਈ ?
ਰਾਤ ਭਾਰੀ ਰਹੇ ਗੀ ਦੱਸੋ ਕਦੋਂ ਤੀਕ ਕੋਈ ?
ਮੈਨੂੰ ਸੂਰਜ ਨੂੰ ਵੀ ਵੇਖੇ ਹੋਏ ਮੁੱਦਤ ਹੋ ਗਈ
ਆਸ ਦੇ ਬੂਟੇ ਮਿਰੇ ਨੂੰ ਮੋਏ ਮੁੱਦਤ ਹੋ ਗਈ
ਛਾਇਆ ਹੋਇਆ ਹੈ ਬੜਾ ਡਾਢਾ ਹਨੇਰਾ ਇੱਥੇ
ਪੀੜਾਂ, ਦਰਦਾਂ ਤੇ ਗ਼ਮਾਂ ਲਾਇਆ ਹੈ ਡੇਰਾ ਇੱਥੇ

ਆਏ ਜਰਵਾਣੇ ਤੇ ਲੁੱਟ ਪੁੱਟ ਕੇ ਸਗਲ ਧਨ ਲੈ ਗਏ
ਸ਼ਾਨ ਮੇਰੀ, ਅਦਾ ਮੇਰੀ ਅਤੇ ਜੋਬਨ ਲੈ ਗਏ
ਵੀਰਾਂ ਨੂੰ ਜਾਨ ਦੇ ਵੈਰੀ ਬਣਾ ਕੇ ਰੱਖ ਦਿੱਤਾ
ਘਰ 'ਚ ਭਾਂਬੜ ਬੜਾ ਉਹਨਾਂ ਮਚਾ ਕੇ ਰੱਖ ਦਿੱਤਾ
ਜਾਂਦੇ ਜਾਂਦੇ ਤਾਂ ਜਮਾਂ ਨ੍ਹੇਰ ਲਿਆ ਦਿੱਤਾ ਸੀ
ਖ਼ੰਜਰਾਂ ਨਾਲ ਮਿਰਾ ਸੀਨਾ ਸਜਾ ਦਿੱਤਾ ਸੀ

ਹੁਣ ਜੋ ਆਲਮ ਹੈ, ਬਿਆਨ ਉਹਨੂੰ ਕਿਵੇਂ ਕੋਈ ਕਰੇ
ਪੁੱਤ ਮੇਰਾ ਵੀ ਕੋਈ ਨਾ ਮਿਰੀ ਦਿਲ ਜੋਈ ਕਰੇ
ਧਰਤੀ ਤਾਂ ਵੰਡੀ ਹੀ, ਇਹ ਦਰਿਆ ਵੀ ਕੀਤੇ ਤਕਸੀਮ
ਕਿੱਥੇ ਉਹ ਰੰਗ ਗਏ , ਕਿੱਥੇ ਗਈ ਸ਼ਾਨ-ਏ-ਕਦੀਮ?
ਕਿਉਂ ਤੁਹਾਨੂੰ ਇਹ ਨਜ਼ਾਰਾ ਭਲਾ ਲੱਗੇ ਚੰਗਾ ?
ਵਿਚ ਦੋ ਆਜ਼ਾਦ ਵਤਨ , ਕੈਦ ਹੋਏ ਪੰਜ ਦਰਿਆ
ਅਕਲ ਵਾਲੇ ਹੀ ਨੇ ਸਾਰੇ ਤਾਂ ਹੀ ਨਫ਼ਰਤ ਵੱਸੇ
ਕੋਈ ਦਿਲ ਵਾਲਾ ਜੇ ਹੋਵੇ ਤਾਂ ਮੁਹੱਬਤ ਹੱਸੇ

ਕਾਹਤੋਂ ਬਾਲੀ ਹੈ ਤੁਸੀਂ ਦਿਲ 'ਚ ਨ-ਜਾਇਜ਼ ਹੀ ਅੱਗ
ਕਿਉਂ ਲਹੂ ਖੌਲਦੇ ਹੋ ਲੀਡਰਾਂ ਦੇ ਆਖੇ ਲੱਗ ?
ਲੀਡਰਾਂ , ਮੀਡੀਆ ਤੇ ਹੋਰਾਂ ਦਾ ਤਾਂ ਕੰਮ ਹੀ ਇਹ ਹੈ
ਲੁੱਟਣਾ ਖੋਹਣਾ ਤਾਂ ਹੈ , ਚੋਰਾਂ ਦਾ ਤਾਂ ਕੰਮ ਹੀ ਇਹ ਹੈ
ਤੁਸੀਂ ਕਿਉਂ ਇਹਨਾਂ ਦੀਆਂ ਗੱਲਾਂ 'ਚ ਆ ਜਾਂਦੇ ਹੋ
ਤੈਸ਼ ਵਿਚ ਆ ਕੇ ਤੁਸੀਂ ਸੁਰਤ ਭੁਲਾ ਜਾਂਦੇ ਹੋ
ਨੇੜੇ ਹੁੰਦੇ ਹੋਏ ਵੀ ਦੂਰੀ ਪਾ ਕੇ ਬਹਿ ਗਏ ਹੋ
ਇਕ ਤਮਾਸ਼ਾ ਜਿਹਾ ਬਣ ਕੇ ਤੁਸੀਂ ਹੁਣ ਰਹਿ ਗਏ ਹੋ
ਖ਼ੁਦ ਤਾਂ ਰੋਂਦੇ ਹੀ ਹੋ , ਮੈਨੂੰ ਵੀ ਰੁਲਾਉਂਦੇ ਹੋ ਤੁਸੀਂ
ਫ਼ਾਸਲੇ ਜਦ ਵੀ ਦਿਲਾਂ ਵਿੱਚ ਵਧਾਉਂਦੇ ਹੋ ਤੁਸੀਂ

ਜ਼ਰਾ ਵੇਖੋ ਤਾਂ ਸਹੀ ਧਰਤੀ ਤੁਹਾਡੀ ਇੱਕ ਹੈ
ਰੰਗ ਇਕ ਹੈ ਤੇ ਜ਼ੁਬਾਂ ਬੋਲੀ ਤੁਹਾਡੀ ਇੱਕ ਹੈ
ਸੱਚ ਆਖਾਂ ਤਾਂ ਨਸਾਂ ਵਿੱਚ ਲਹੂ ਵੀ ਇੱਕ ਹੈ
ਇਹ ਤੁਹਾਡੀ ਹਵਾ ਦਾ ਰੰਗ ਤੇ ਬੂ ਵੀ ਇੱਕ ਹੈ
ਫ਼ਰਕ ਮਜ਼ਹਬ ਦੇ ਤੁਸੀਂ ਲੱਭ ਨਿਖੇੜੇ ਕੀਤੇ
ਸੈਂਕੜੇ ਹੀ ਖੜੇ ਫਿਰ ਝਗੜੇ ਤੇ ਝੇੜੇ ਕੀਤੇ
ਰੱਬ ਮੂਹਰੇ ਕਰਾਂ ਮੈਂ ਬੱਸ ਇਹੋ ਹੀ ਫ਼ਰਿਆਦ
ਜ਼ਿਹਨ ਖ਼ਲਕਤ ਦਾ ਕਰੀ ਕੈਦੋਂ ਖ਼ੁਦਾਇਆ ਆਜ਼ਾਦ

Wednesday, 20 February 2019

ਮੀਡੀਆ

ਕੀ ਰਹਿ ਗਿਆ ਹੈ ਹੁਣ ਤੇਰਾ ਇਤਬਾਰ ਮੀਡੀਆ ?
ਸਭ ਹੱਦਾਂ ਨੂੰ ਹੀ ਕਰਦਾ ਪਿਆ ਪਾਰ ਮੀਡੀਆ ।
ਇੱਕੋਂ ਹੀ ਪਾਸਿਓਂ ਦੀ ਇਹ ਤਸਵੀਰ ਨੂੰ ਵਿਖਾ
ਕਰਦਾ ਹੈ ਸਾਹਿਬਾਂ ਦਾ ਤੂੰ ਸਤਿਕਾਰ ਮੀਡੀਆ ।
ਮਜ਼ਲੂਮਾਂ ਦੀ ਨਾ ਪੀੜ ਵਿਖਾਵੇ ਤੂੰ ਭੁੱਲ ਕੇ ਵੀ
ਨਫ਼ਰਤ ਦਾ ਖੁੱਲ੍ਹ ਕੇ ਕਰੇ ਪਰਚਾਰ ਮੀਡੀਆ ।
ਜਾਹਲ ਵੀ ਕਰਦੇ ਨੇ ਬੜਾ ਉਸ ਬੋਲੀ ਤੋਂ ਗੁਰੇਜ਼
ਤੂੰ ਜਿਹੜੇ ਲਫ਼ਜ਼ਾਂ ਵਿਚ ਕਰੇ ਗੁਫ਼ਤਾਰ ਮੀਡੀਆ ।

ਦਸਤੂਰ ਹੀ ਨਿਰਾਲੇ ਨੇ ਇਸ ਮੁਲਕ ਦੇ ਜਦੋਂ
ਫਿਰ ਹੁਣ ਕਰੇ ਵੀ ਤਾਂ ਕੀ ਇਹ ਲਾਚਾਰ ਮੀਡੀਆ ?
ਹਿੱਸੇ 'ਚ ਉਹਦੇ ਸਿਰਫ਼ ਮਲਾਮਤ ਹੀ ਤਾਂ ਪਵੇ
ਜੇ ਸੱਚੀ ਗੱਲ ਦਾ ਕਰੇ ਇਜ਼ਹਾਰ ਮੀਡੀਆ ।

Monday, 18 February 2019

ਜਗ ਵੇਖ ਕੇ ਤਾਂ ਦਿਲ ਮਿਰਾ ਭਾਰਾ ਹੋ ਹੀ ਜਾਂਦੈ ।
ਨੇਕੀ ਦੇ ਵਪਾਰਾਂ 'ਚ ਖ਼ਸਾਰਾ ਹੋ ਹੀ ਜਾਂਦੈ ।

ਮੈਂ ਪੂਰਾ ਜਤਨ ਕਰਦਾਂ ਕਿ ਲੱਭਾਂ ਖ਼ੁਸ਼ੀ ਇੱਥੇ
ਪਰ ਫੇਰ ਵੀ ਗ਼ਮ ਦਾ ਤਾਂ ਨਜ਼ਾਰਾ ਹੋ ਹੀ ਜਾਂਦੈ ।

ਤੂੰ ਹੌਸਲਾ ਨਾ ਹਾਰ ਕਿ ਇਸ ਵਕਤ ਦੇ ਹੱਥੋਂ
ਪੀੜਾਂ ਦਾ ਕੋਈ ਨਾ ਕੋਈ ਚਾਰਾ ਹੋ ਹੀ ਜਾਂਦੈ ।

ਕਿੱਡਾ ਵੀ ਸਿਆਣਾ ਜਾਂ ਹੁਨਰਮੰਦ ਉਹ ਹੋਵੇ
ਵੇਹਲਾ ਜੇ ਉਹ ਬੈਠੇ ਤਾਂ ਨਕਾਰਾ ਹੋ ਹੀ ਜਾਂਦੈ ।

Tuesday, 25 December 2018

ਬਹਾਦਰੀ ਦਾ ਨਾਂ , ਮਰਦ-ਏ-ਖ਼ੁਦਾ ਗੁਰੂ ਗੋਬਿੰਦ ,
ਹੈ ਸਬਰ , ਸ਼ੁਕਰ ਦੀ ਤੂੰ ਇੰਤਹਾ ਗੁਰੂ ਗੋਬਿੰਦ ।

ਕਿ ਹੱਕ ਸੱਚ ਦੀ ਖ਼ਾਤਰ ਨਿਸਾਰ ਹੋਣਾ ਕਿਵੇਂ ,
ਇਹ ਕੁਲ ਜਹਾਂ ਨੂੰ ਤੂੰ ਦਿੱਤਾ ਸਿਖਾ ਗੁਰੂ ਗੋਬਿੰਦ ।

ਨਿਤਾਣਿਆਂ , ਡਰੇ ਮਜ਼ਲੂਮਾਂ ਤੇ ਵਿਚਾਰਿਆਂ ਨੂੰ ,
ਗਿਆ ਤੂੰ ਸੰਤ ਸਿਪਾਹੀ ਬਣਾ ਗੁਰੂ ਗੋਬਿੰਦ ।

ਜ਼ਮੀਨ ਸੁੱਕੀ ਹੋਈ ਤੇ ਉਮੀਦ ਤੋਂ ਖ਼ਾਲੀ ,
ਵਰ੍ਹੇ ਉਹ ਧਰਤੀ ਤੇ ਬਣ ਕੇ ਘਟਾ ਗੁਰੂ ਗੋਬਿੰਦ ।

ਹਕੂਮਤ-ਏ-ਸਿਤਮ ਆਰਾ ਦੇ ਖ਼ਾਤਮੇ ਦੇ ਲਈ,
ਤੂੰ ਰੂਹ ਖ਼ਲਕ ਦੀ ਦਿੱਤੀ ਜਗਾ ਗੁਰੂ ਗੋਬਿੰਦ ।

ਨਾ ਡੋਲਿਆ ਸੀ ਪਿਤਾ ਦੀ ਸ਼ਹੀਦੀ ਦੇ ਮਗਰੋਂ ,
ਤੇ ਸ਼ੁਕਰ ਕਰਦਾ ਹੈ ਪੁੱਤ ਵੀ ਲੁਟਾ ਗੁਰੂ ਗੋਬਿੰਦ ।

ਕਲਮ ਤੇ ਤੇਗ਼ ਦੇ ਜੌਹਰ ਜੋ ਤੂੰ ਵਿਖਾ ਕੇ ਗਿਆ ,
ਬਿਆਨ ਕਰਦੇ ਤੇਰਾ ਹੌਸਲਾ ਗੁਰੂ ਗੋਬਿੰਦ ।

ਜੋ ਕਾਰਨਾਮੇ ਅਜ਼ੀਮ ਆਦਮੀ ਨੇ ਨਾ ਸੀ ਸੁਣੇ ,
ਗਿਆ ਉਹ ਅੱਧੀ ਸਦੀ ਵਿਚ ਵਿਖਾ ਗੁਰੂ ਗੋਬਿੰਦ ।

Sunday, 9 December 2018

ਪੰਜਾਬ ਤੈਨੂੰ ਪੁੱਤ ਪਏ ਸੂਲੀ ਤੇ ਚਾੜ੍ਹ ਦੇ ,
ਤਸਵੀਰ ਰੰਗਲੀ ਜਿਹੀ ਜਾਂਦੇ ਵਿਗਾੜ ਦੇ ।

ਧਰਤੀ ਦਾ ਦਿਲ ਹੈ ਟੁੱਟਦਾ ਮਿੱਟੀ ਦੀ ਕੂਕ ਸੁਣ ,
ਖੇਤਾਂ 'ਚ ਜਦ ਕਦੇ ਵੀ ਪਰਾਲੀ ਨੂੰ ਸਾੜ ਦੇ ।

ਲਾਲਚ ਨੇ ਹੀ ਇਹ ਪਾਠ ਪੜ੍ਹਾਇਆ ਮਨੁੱਖ ਨੂੰ ,
ਸ਼ਹਿਰ ਆਪਣੇ ਉਸਾਰ ਤੂੰ ਜੰਗਲ ਉਜਾੜ ਦੇ ।

ਸੋਚਾਂ ਦਿਆਂ ਪਰਾਂ ਨੂੰ ਵਧਾ ਵੀ ਲਈ ਜ਼ਰੂਰ ,
ਪਹਿਲਾਂ ਤੂੰ ਇਹਦੇ ਉੱਤੇ ਲਗੀ ਧੂੜ ਝਾੜ ਦੇ ।

ਸਰਦ ਉਹਦਾ ਦਿਲ ਹੈ ਪੋਹਾਂ ਤੇ ਮਾਘਾਂ ਦੇ ਵਾਂਗਰਾਂ ,
ਪਰ ਉਹ ਵਿਖਾਵੇ ਕਰਦਾ ਪਿਆ ਜੇਠ ਹਾੜ ਦੇ ।

Wednesday, 24 October 2018

ਕਿਸੇ ਵੱਲੋਂ ਤਾਂ ਸੀ ਤਕਸੀਰ ਹੋਈ,
ਨਵੀਂ ਦੁਨੀਆ ਜਦੋਂ ਤਾਮੀਰ ਹੋਈ ।

ਇਹ ਦਰਿਆ ਵੀ ਕਦੇ ਦਰਿਆ ਸੀ ਹੁੰਦੇ ,
ਬੜੀ ਗ਼ਮਗੀਨ ਹੁਣ ਤਸਵੀਰ ਹੋਈ ।

ਗ਼ੁਲਾਮੀ ਕਰਦੇ ਬੰਦਾ ਥੱਕਿਆ ਨਾ ,
ਰਹੀ ਧਨ ਨੇ ਕਸੀ ਜ਼ੰਜੀਰ ਹੋਈ ।

ਤਿਰੇ ਲੋਭੀ ਸੁਭਾਅ ਦੀ ਹੈ ਗਵਾਹੀ ,
ਕੁੜੱਤਣ ਜਿਹੜੀ ਆਲਮਗੀਰ ਹੋਈ ।

ਵਿਰਾਸਤ ਵਿਚ ਮਿਲੀ ਹਰ ਚੀਜ਼ ਸਾਨੂੰ,
ਅਸਾਡੀ ਕੀਮਤੀ ਜਾਗੀਰ ਹੋਈ ।

Monday, 22 October 2018

ਵੇਖੋ ਖ਼ਾਲਕ ਦੀ ਇਨਾਇਤ ਤੇ ਸਹਾਰੇ ਵੇਖੋ ,
ਤੇ ਕਿਵੇਂ ਕੰਮ ਬਣਨ ਆਪ ਮੁਹਾਰੇ ਵੇਖੋ ।

ਮਾਲੋ ਜ਼ਰ ਦੇ ਨਾ ਇਲਾਵਾ ਜਿਨ੍ਹਾਂ ਨੂੰ ਕੁਝ ਵੀ ਦਿਸੇ,
ਸੱਖਣੇ ਰੂਹ ਤੇ ਦਿਲ ਤੋਂ ਉਹ ਵਿਚਾਰੇ ਵੇਖੋ ।

ਉਹਨਾਂ ਨੇ ਕਿੱਦਾਂ ਬਸਰ ਕੀਤਾ ਹੈ ਭਾਗਾਂ ਦੇ ਬਿਨਾਂ,
ਦੋਜ਼ਖ਼ਾਂ ਵਿਚ ਵੀ ਕਿਵੇਂ ਹੁੰਦੇ ਗੁਜ਼ਾਰੇ ਵੇਖੋ ।

ਲੋੜ ਤੋਂ ਵੱਧ ਕੇ ਸੱਚਾ ਨਹੀਂ ਹੋਵਣ ਦਿੱਤਾ,
ਏਸ ਚਿੰਤਾ ਨੇ ਕਿ ਰੁਸ ਜਾਣ ਨਾ ਪਿਆਰੇ ਵੇਖੋ ।

ਚੰਨ ਦੇ ਬਾਝੋਂ ਵੀ ਹੁੰਦਾ ਹੈ ਗਗਨ ਚੰਗਾ ਭਲਾ,
ਸ਼ਾਨ ਅੰਬਰ ਦੀ ਤਾਂ ਹੁੰਦੇ ਨੇ ਸਿਤਾਰੇ ਵੇਖੋ ।

ਵਕਤ ਨੇ ਸਾਰੇ ਗ਼ਰੂਰਾਂ 'ਚ ਹੀ ਡੁੱਬੇ ਬੰਦੇ ,
ਕਿੱਦਾਂ ਉੱਤੇ ਚੜ੍ਹਾ ਕੇ ਥੱਲ੍ਹੇ ਉਤਾਰੇ ਵੇਖੋ ।

ਸੂਫ਼ੀਆਂ ਸੰਤਾਂ ਦੀ ਵੀ ਮੰਨੋ ਤੇ ਉਸ ਮਾਲਕ ਦੇ,
ਝਾਤੀਆਂ ਮਾਰ ਕੇ ਦਿਲ ਵਿੱਚ ਇਸ਼ਾਰੇ ਵੇਖੋ ।

ਜਾਣਦੇ ਨੇ ਕੇ ਤਲਾਤੁਮ ਨੇ ਬੜੇ ਸਾਗਰ ਵਿਚ ,
ਫਿਰ ਵੀ ਆਬਾਦ ਕਰੀ ਬੈਠੇ ਕਿਨਾਰੇ ਵੇਖੋ ।

ਇਸ ਜ਼ਮਾਨੇ ਦੀਆਂ ਹੀਰਾਂ ਦੇ ਵੀ ਖੇੜੇ ਵੇਖੋ ,
ਅੱਜ ਦੇ ਰਾਂਝਿਆ ਦੇ ਤਖ਼ਤ ਹਜ਼ਾਰੇ ਵੇਖੋ ।

ਮਨ ਤਾਂ ਭਰਦਾ ਹੀ ਨਹੀਂ ਭਾਵੇਂ ਤੁਸੀਂ ਜਗ ਉੱਤੇ,
ਜਿੰਨੇ ਮਰਜ਼ੀ ਹੀ ਤਮਾਸ਼ੇ ਤੇ ਨਜ਼ਾਰੇ ਵੇਖੋ ।

ਪੰਜਾਬ ਦੀ ਸਰਜ਼ਮੀਨ ਦੀ ਫ਼ਰਿਆਦ

ਕਿਉਂ ਨਹੀਂ ਸੁਣਦਾ ਪਿਆ ਤੱਤੜੀ ਦੀ ਚੀਕ ਕੋਈ ? ਰਾਤ ਭਾਰੀ ਰਹੇ ਗੀ ਦੱਸੋ ਕਦੋਂ ਤੀਕ ਕੋਈ ? ਮੈਨੂੰ ਸੂਰਜ ਨੂੰ ਵੀ ਵੇਖੇ ਹੋਏ ਮੁੱਦਤ ਹੋ ਗਈ ਆਸ ਦੇ ਬੂਟੇ ਮਿਰੇ ਨੂੰ ਮ...