ਹੈ ਅਨੋਖੀ ਤੇਰੀ ਅਜ਼ਮਤ, ਤੇਰੀ ਉਸਤਤ ਦੀ ਗੱਲ ,
ਪਾਣੀ, ਧਰਤੀ, ਹਵਾ, ਮਿੱਟੀ , ਤੇਰੀ ਕੁਦਰਤ ਦੀ ਗੱਲ ।

ਗੱਡ ਕੇ ਆਪਣੀ ਕਬਰ ਆਪਣੇ ਹੀ ਹੱਥੀਂ ਮਨੁੱਖ ,
ਕਰ ਰਿਹਾ ਹੈ ਇਹ ਤਰੱਕੀ ਅਤੇ ਜਿੱਦਤ ਦੀ ਗੱਲ ।

ਰੱਬ ਦੀ ਧਰਤੀ ਦਾ ਸਤਕਾਰ ਕਰ ਓ ਨਾਦਾਨਾ !
ਸੱਦਾ ਪਰਲੋ ਲਈ ਹੈ ਤੇਰੀ ਤਜਾਰਤ ਦੀ ਗੱਲ ।

ਖ਼ਵਾਰੀ ਤੇ ਜ਼ਿੱਲਤਾਂ ਦੀ ਆਦੀ ਹੋ ਜਾਂਦੀ ਉਹ ਕੌਮ
ਸਮਝੇ ਨਾ ਕਰਨੀ ਜ਼ਰੂਰੀ ਜੋ ਵਿਰਾਸਤ ਦੀ ਗੱਲ ।  

ਧਰਤੀ ਤੇ ਅੰਬਰਾਂ ਨੇ ਸੀਸ ਝੁਕਾਏ ਦਿੱਤੇ
ਹੋਈ ਜਦ ਗੁਰਮੁਖਾਂ ਦੀ ਘਾਲ, ਸ਼ਹਾਦਤ ਦੀ ਗੱਲ।

ਪਹਿਲਾਂ ਤਾਂ ਜ਼ੁਲਮ, ਤਸ਼ੱਦਦ ਤੇ ਸਿਤਮ ਕਰਦੇ ਨੇ
ਫੇਰ ਕੰਬ ਉੱਠਦੇ ਨੇ ਉਹ ਸੁਣ ਕੇ ਬਗ਼ਾਵਤ ਦੀ ਗੱਲ ।