ਅਰਦਾਸ

ਕਾਹਤੋਂ ਨਜ਼ਰ ਤੂੰ ਫੇਰ ਲਈ ਮੇਰੇ ਸਾਈਆਂ ,
ਓ ਰੱਬਾ! ਜਿੰਦੜੀ ਮੇਰੀ ਕੁਰਲਾਵੇ ਰਾਤ ਦਿਨ,
ਕੱਲ੍ਹੀ, ਨਿਮਾਣੀ ਜਿੰਦ ਹੈ ਦੇਸ ਆਪਣੇ ਤੋਂ ਦੂਰ,
ਕਿੱਦਾਂ ਗੁਜ਼ਾਰਾ ਹੋਵੇ ਜਹਾਂ ਵਿੱਚ ਤੇਰੇ ਬਿਨ?
ਸੜ ਬਲ ਕੇ ਹਿਜਰ ਦੀ ਅਗਨ ਅੰਦਰ ਘੜੀ ਘੜੀ,
ਦਰ ਦਰ ਤੇ ਰੁਲ਼ ਕੇ ਬਾਜ਼ੀ ਅਸੀਂ ਹਰਦੇ ਜਾਈਏ ,
ਬੇ-ਰਹਿਮ ਪੰਜ ਦੂਤਾਂ ਦੀ ਇਸ ਸਖ਼ਤ ਕੈਦ ਵਿੱਚ ,
ਘੁੱਟੇ ਇਹ ਸਾਹ ਸਾਡਾ , ਅਸੀਂ ਮਰਦੇ ਜਾਈਏ ।

ਜੇ ਤੇਰੀ ਓਟ, ਆਸਰਾ ਮਿਲ ਜੇ ਤਾਂ ਕਹਿਣੇ ਕੀ!
ਵਿਗੜੀ ਕੋਈ ਵੀ ਗੱਲ ਕਰੇ ਹੱਲ ਤੇਰੀ ਨਿਗਾਹ ,
ਭੁੱਲਾਂ, ਗੁਨਾਹਾਂ, ਪਾਪਾਂ, ਖ਼ਤਾਵਾਂ ਨੂੰ ਬਖ਼ਸ਼ ਦੇ ,
ਆਵੇ ਕਦੇ ਇਹ ਪਾਪੀ ਦੇ ਵੀ ਵੱਲ ਤੇਰੀ ਨਿਗਾਹ ।
ਇਹ ਛੋਟੀ ਮੱਤ ਮੇਰੀ 'ਚ ਕਰਦੇ ਤੂੰ ਚਾਨਣਾ ,
ਭੈੜਾ ਕੋਈ ਵਿਚਾਰ ਤਾਂ ਭੁੱਲ ਕੇ ਵੀ ਨਾ ਰਹੇ ,
ਲਿਵ ਜਿਸ ਨੂੰ ਤੇਰੇ ਨਾਮ ਦੀ ਲੱਗ ਜਾਏ ਓਸ 'ਤੇ ,
ਹਉਮੈਂ ਦਾ ਕੋਈ ਭਾਰ ਤਾਂ ਭੁੱਲ ਕੇ ਵੀ ਨਾ ਰਹੇ ।