ਰੋਕਣੇ ਅੱਥਰੂ ਖਾਰੇ ਔਖੇ।
ਸਿਰਫ਼ ਧਰਤੀ ਨਹੀਂ ਆਦਮ ਤੋਂ ਤੰਗ,
ਇਹਦੇ ਤੋਂ ਚੰਨ ਸਿਤਾਰੇ ਔਖੇ।
ਜੋ ਕਦੇ ਕਰਦੇ ਸੀ ਔਖਾ ਮੈਨੂੰ,
ਅੱਜ ਉਹ ਲੋਕ ਵਿਚਾਰੇ ਔਖੇ।
ਤੇਰੇ ਨਖ਼ਰੇ ਬੜੇ ਭਾਰੇ ਸੀ ਯਾਰ,
ਤੇਰੇ ਕਰਕੇ ਹੋਏ ਸਾਰੇ ਔਖੇ।
ਇਸ ਤਰ੍ਹਾਂ ਜ਼ੋਰ ਕੇ ਨਾ ਹੱਸਿਆ ਕਰ,
ਹੁੰਦੇ ਨੇ ਦਰਦ ਦੇ ਮਾਰੇ ਔਖੇ।
ਬੰਦ ਮੈਂ ਇਸ਼ਕ ਦਾ ਧੰਦਾ ਕਰ 'ਤਾ,
ਜਰਨੇ ਹੁਣ ਹੋਰ ਖ਼ਸਾਰੇ ਔਖੇ।
ਜਦੋਂ ਹਮਰਾਹ ਤਿਰੀ ਯਾਦ ਨਾ ਸੀ,
ਅਸੀਂ ਉਹ ਵਕਤ ਗੁਜ਼ਾਰੇ ਔਖੇ।
ਤੈਨੂੰ ਕੀ ਫ਼ਰਕ ਪਵੇ ਦਰਿਆਵਾ!
ਹੋਣ ਜੇ ਤੈਥੋਂ ਕਿਨਾਰੇ ਔਖੇ!
ਮੈਂ ਤਾਂ ਸਿੱਧਾ ਹੀ 'ਨਾ' ਕਹਿ ਦਿੰਦਾ ਹਾਂ,
ਲਾਉਣੇ ਮੇਰੇ ਲਈ ਲਾਰੇ ਔਖੇ।
ਰਾਹ ਵਿਚ ਰੋੜੇ ਤਾਂ ਮਿਲ ਜਾਂਦੇ ਨੇ,
ਹੁੰਦੇ ਪਰ ਲੱਭਣੇ ਸਹਾਰੇ ਔਖੇ।
ਜਿੰਦ ਦੇ ਵਿੰਗ-ਵਲਾਂ ਨੇ 'ਸਿਮਰਨ',
ਕੀਤੇ ਨੇ ਧਰਤੀ 'ਤੇ ਸਾਰੇ ਔਖੇ।
