ਜ਼ਮੀਨਾਂ, ਪੌਣਾਂ ਦੀ ਬੋਲੀ
ਦਰਖ਼ਤਾਂ, ਤ੍ਰੇਲਾਂ ਦੀ ਬੋਲੀ ।
ਗੁਲਾਬਾਂ, ਖ਼ਾਰਾਂ ਦੀ ਬੋਲੀ
ਵਿਜੋਗਾਂ, ਮੇਲਾਂ ਦੀ ਬੋਲੀ ।
ਸਿਆੜਾਂ, ਖੇਤਾਂ ਦੀ ਬੋਲੀ
ਲਹੂ, ਦਿਲ, ਸਾਹਾਂ ਦੀ ਬੋਲੀ ।
ਕਿ ਧੁੱਪਾਂ, ਛਾਵਾਂ ਦੀ ਬੋਲੀ
ਕਿ ਸੁੰਞੇ ਰਾਹਾਂ ਦੀ ਬੋਲੀ ।
ਜਨੌਰਾਂ, ਡਾਰਾਂ ਦੀ ਬੋਲੀ
ਖ਼ੁਦਾ ਦੇ ਜੀਵਾਂ ਦੀ ਬੋਲੀ ।
ਅਵਾਰਾ ਧੂੜਾਂ ਦੀ ਬੋਲੀ
ਥਲਾਂ, ਦਰਿਆਵਾਂ ਦੀ ਬੋਲੀ ।
ਬਸੰਤਾਂ, ਫੁੱਲਾਂ ਦੀ ਬੋਲੀ
ਨਸੀਮਾਂ, ਬਾਦਾਂ ਦੀ ਬੋਲੀ ।
ਸ਼ਮੀਮਾਂ, ਬਾਗ਼ਾਂ ਦੀ ਬੋਲੀ
ਖਰੀ ਦਿਲਸ਼ਾਦਾਂ ਦੀ ਬੋਲੀ ।
ਉਕਾਬਾਂ, ਸ਼ਾਹਾਂ ਦੀ ਬੋਲੀ
ਅਕਾਲੀ ਵਾਕਾਂ ਦੀ ਬੋਲੀ ।
ਗੁਰਾਂ ਦੇ ਸਿੱਖਾਂ ਦੀ ਬੋਲੀ
ਹੈ ਪਾਕੰ ਪਾਕਾਂ ਦੀ ਬੋਲੀ ।
ਕੋਈ ਅੱਖਰ ਪੜ੍ਹਾ ਸਾਨੂੰ
ਇਹ ਬੋਲੀ ਤੂੰ ਸਿਖਾ ਸਾਨੂੰ ।
ਕਿ ਰਮਜ਼ਾਂ ਗੁੱਝੀਆਂ ਖੁੱਲ੍ਹਣ
ਨਵੇਂ ਨਗ਼ਮੇ ਸੁਣਾ ਸਾਨੂੰ ।
ਅਸਾਡੇ ਤੇ ਕਰਮ ਹੋਵੇ
ਤੇਰੀ ਕੁਦਰਤ ਦੀ ਗੱਲ ਸੁਣੀਏ ,
ਭੁਲਾ ਕੇ ਅਕਲਾਂ ਦੀ ਬੋਲੀ
ਤੇਰੀ ਧਰਤੀ ਦੀ ਗੱਲ ਸੁਣੀਏ !
