ਅਲੋਪ ਹੋ ਰਹੀ ਹੈ

ਖੁਦ ਦੇ ਘਰ ਉਸਾਰਨ ਲਈ ਦਿੱਤੇ ਜਿਨ੍ਹਾਂ ਦੇ ਢਾਹ ,
ਔਖਾ ਕਰ ਦਿੱਤਾ ਜਿਨ੍ਹਾਂ ਲਈ ਲੈਣਾ ਇੱਕ ਵੀ ਸਾਹ ,
ਆਪਣੇ ਸ਼ੌਂਕ ਪੂਰੇ ਕਰਨ ਲਈ ਜਿਨ੍ਹਾਂ ਦੀ ਹੋਂਦ ਰਿਹਾ ਮਿਟਾ ,
ਸਮਝ ਨਹੀਂ ਰਿਹਾ ਤੂੰ ਜਿਨ੍ਹਾਂ ਦੇ ਜਜ਼ਬਾਤ ,
ਅਲੋਪ ਹੋ ਰਹੀ ਹੈ ਉਨ੍ਹਾਂ ਜੀਵਾਂ ਦੀ ਜਾਤ |

ਇੱਥੇ ਕਰਦੇ ਸੀ ਸਾਰੇ ਸੁੱਖੀ ਸਾਂਦੀਂ ਗੁਜ਼ਾਰੇ ,
ਰੱਬ ਦੀ ਖੂਬਸੂਰਤ ਦੁਨੀਆ ਦੇ ਲੈਂਦੇ ਸੀ ਨਜ਼ਾਰੇ ,
ਪਰ ਮਨੁੱਖ ਦੇ ਸਵਾਰਥ ਅੱਗੇ ਬੇਬਸ ਹੋ ਗਏ ਸਾਰੇ ,
ਕਰ ਦਿੱਤੀ ਮਨੁੱਖ ਨੇ ਇਹਨਾਂ ਦੇ ਲਹੂਆਂ ਦੀ ਬਰਸਾਤ ,
ਅਲੋਪ ਹੋ ਰਹੀ ਹੈ ਉਨ੍ਹਾਂ ਜੀਵਾਂ ਦੀ ਜਾਤ |

ਇਹਨਾਂ ਜੀਵਾਂ ਦੀ ਅਵਾਜ਼ ਨਾਲ ਰੌਣਕ ਰਹਿੰਦੀ ਸੀ ਪੂਰੀ ,
ਇਹ ਸਾਜ਼ ਨੇ ਧਰਤੀ ਲਈ ਬਹੁਤ ਜ਼ਰੂਰੀ ,
ਸਮਝੋ ਦੁਨੀਆ ਵਾਲਿਓ ਧਰਤੀ ਦੀ ਮਜਬੂਰੀ ,
ਮਸ਼ੀਨਾਂ ਦੇ ਰੌਲੇ ਕਰ ਕੇ ਸਿਰ-ਦਰਦ ਰਹਿੰਦਾ ਦਿਨ ਰਾਤ ,
ਅਲੋਪ ਹੋ ਰਹੀ ਹੈ ਉਨ੍ਹਾਂ ਜੀਵਾਂ ਦੀ ਜਾਤ |

ਇੱਥੇ ਹਰ ਇੱਕ ਜੀਵ ਕਰ ਲੈਂਦਾ ਪੂਰੀਆਂ ਲੋੜ੍ਹਾਂ ,
ਪਰ ਇੱਕ ਮਨੁੱਖ ਲਈ ਹੈ ਇਸ ਧਰਤੀ ਤੇ ਥੋੜ੍ਹਾਂ ਹੀ ਥੋੜ੍ਹਾਂ ,
ਆਪਣਾ ਸੰਦੂਕ ਵੇਖ ਕੇ ਸੋਚਦਾ ,"ਹੋਰ ਕੀ ਕੀ ਜੋੜਾਂ?",
ਇਸੇ ਲਾਲਚ ਨੇ ਕੀਤੀ ਹੈ ਤਬਾਹੀ ਦੀ ਸ਼ੁਰੂਆਤ ,
ਅਲੋਪ ਹੋ ਰਹੀ ਹੈ ਉਨ੍ਹਾਂ ਜੀਵਾਂ ਦੀ ਜਾਤ |