ਬਹਾਦਰੀ ਦਾ ਨਾਂ , ਮਰਦ-ਏ-ਖ਼ੁਦਾ ਗੁਰੂ ਗੋਬਿੰਦ ,
ਹੈ ਸਬਰ , ਸ਼ੁਕਰ ਦੀ ਤੂੰ ਇੰਤਹਾ ਗੁਰੂ ਗੋਬਿੰਦ ।
ਕਿ ਹੱਕ ਸੱਚ ਦੀ ਖ਼ਾਤਰ ਨਿਸਾਰ ਹੋਣਾ ਕਿਵੇਂ ,
ਇਹ ਕੁਲ ਜਹਾਂ ਨੂੰ ਤੂੰ ਦਿੱਤਾ ਸਿਖਾ ਗੁਰੂ ਗੋਬਿੰਦ ।
ਨਿਤਾਣਿਆਂ , ਡਰੇ ਮਜ਼ਲੂਮਾਂ ਤੇ ਵਿਚਾਰਿਆਂ ਨੂੰ ,
ਗਿਆ ਤੂੰ ਸੰਤ ਸਿਪਾਹੀ ਬਣਾ ਗੁਰੂ ਗੋਬਿੰਦ ।
ਜ਼ਮੀਨ ਸੁੱਕੀ ਹੋਈ ਤੇ ਉਮੀਦ ਤੋਂ ਖ਼ਾਲੀ ,
ਵਰ੍ਹੇ ਉਹ ਧਰਤੀ ਤੇ ਬਣ ਕੇ ਘਟਾ ਗੁਰੂ ਗੋਬਿੰਦ ।
ਹਕੂਮਤ-ਏ-ਸਿਤਮ ਆਰਾ ਦੇ ਖ਼ਾਤਮੇ ਦੇ ਲਈ,
ਤੂੰ ਰੂਹ ਖ਼ਲਕ ਦੀ ਦਿੱਤੀ ਜਗਾ ਗੁਰੂ ਗੋਬਿੰਦ ।
ਨਾ ਡੋਲਿਆ ਸੀ ਪਿਤਾ ਦੀ ਸ਼ਹੀਦੀ ਦੇ ਮਗਰੋਂ ,
ਤੇ ਸ਼ੁਕਰ ਕਰਦਾ ਹੈ ਪੁੱਤ ਵੀ ਲੁਟਾ ਗੁਰੂ ਗੋਬਿੰਦ ।
ਕਲਮ ਤੇ ਤੇਗ਼ ਦੇ ਜੌਹਰ ਜੋ ਤੂੰ ਵਿਖਾ ਕੇ ਗਿਆ ,
ਬਿਆਨ ਕਰਦੇ ਤੇਰਾ ਹੌਸਲਾ ਗੁਰੂ ਗੋਬਿੰਦ ।
ਜੋ ਕਾਰਨਾਮੇ ਅਜ਼ੀਮ ਆਦਮੀ ਨੇ ਨਾ ਸੀ ਸੁਣੇ ,
ਗਿਆ ਉਹ ਅੱਧੀ ਸਦੀ ਵਿਚ ਵਿਖਾ ਗੁਰੂ ਗੋਬਿੰਦ ।
